Srpski teniser Novak Đoković i Bjeloruskinja Arina Sabalenka eliminisani su već u prvom kolu mješovitog dubla na Otvorenom prvenstvu SAD, nakon poraza od britansko-češkog para Henrija Patena i Katerine Sinijakove rezultatom 1:4, 4:2, 10:2.
ADVERTISEMENT
Đoković i Sabalenka imali su prednost od jednog seta i brejka, ali su rivalima dopustili da osvoje tri gema zaredom i izbore odlučujući super taj-brejk.
U mješovitom dublu na US Openu igra se na dva dobijena seta, s tim da set osvaja par koji prvi stigne do četiri gema. Nakon izjednačenja na „đusu“ nema prednosti, već se igra odlučujući poen, dok se pri rezultatu 1:1 u setovima igra super taj-brejk do 10 poena.
U četvrtfinalu će Paten i Sinijakova igrati protiv bračnog para Gaela Monfisa i Eline Svitoline, koji su u prvom kolu savladali Feliksa Ože-Alijasima i Aleksandru Ealu rezultatom 4:1, 4:1.
Samo pobjednički par u konkurenciji mješovitog dubla osvojiće novčanu nagradu od milion dolara.